旅遊攻略 - 名古屋 (美食篇)
全內臟晚餐，豬子宮，牛心，牛胃，牛大腸，牛小腸，豬大腸，豬小腸，你又試過未呢？日本嘅飲食文化千奇百怪，只要你夠勇敢，真係咩都有得你食！今次我哋就介紹一間燒肉餐廳，不過主打嘅就係豬牛內臟！
呢間餐廳標榜所有內臟都經過特別處理，保證安全乾淨。之前都有講過，名古屋好出名味噌，所以大部份嘅內臟，都由味噌腌製，就算你對內臟有幾咁恐懼，加左味噌感覺一定良好咗好多！咁多款內臟，我個人推介豬子宮！喺香港，我估你諗都無諗過豬子宮都可以食，不過當你攞出勇氣黎食，真係不得了！咬落去非常彈牙！味道方面，有啲似香港街頭可以食到嘅炸大腸，不過爽口好多！
另外牛胃都係非常好食！牛胃個質地好爽口，感覺有少少似雞腎，但個質地就再實少少。至於牛心，相對就有少少似肝嘅感覺，唔係特別爽口，不過個質地都幾特別，絕對值得一試！
至於嗰啲牛大腸牛小腸豬大腸豬小腸，我相信好多人都食過，不過呢度食就少咗一陣污糟嘅感覺，唔會好似係香港街頭食到豬大腸咁，有時有陣好怪嘅味道。
雖然呢間餐廳主打內臟，不過如果你同行嘅朋友唔喜歡食內臟，都唔使擔心！因為呢間餐廳都有普通豬肉同牛肉嘅選擇，都非常爽口好食！一路食內臟一路飲酒簡直係人生一大樂事！呢間餐廳有好多款唔同嘅酒精提供。除咗一般嘅啤酒威士忌梅酒之外仲有好多唔同款式嘅果汁酒，總有一款啱你嘅口味。
食完餐咁熱氣嘅燒肉，咁要食返個甜品滋潤一下啦。呢度有個抹茶雪糕嘅甜品，非常有特色。佢將個抹茶雪糕放係一個雪到冰左嘅石鍋上面，配合粟米片同埋糖漿，咬落去抹茶味非常濃郁，絕對值得推介。可能因為個石鍋夠凍，可以保持個雪糕唔會溶，咬落去冰感十足！如果你唔識叫，唔緊要！因為據我觀察，現場大部份嘅人都會叫呢款甜品，你可以直接同服務員講，指話要果一款甜品，咁就得啦！
名古屋名物 味噌とんちゃん屋 栄ホルモン
愛知県名古屋市中区栄３－２－２５
Search